Таче республикысе школлаште пытартыш йыҥгыр пайрем эртен
Таче республикысе школлаште пытартыш йыҥгыр пайрем эртен. Тений тудо кундемна мучко 9 классым тунем пытарыше шым тӱжемат 391 да латик классым пытарыше кок тӱжемат 785 выпускниклан йоҥген. Школышто тунемше- влаклан сугынь шомакым Марий Элым вуйлатыше Юрий Зайцев ойлен. Кызыт самырык еҥ- влак ончылно ик эн кӱлешан задаче шога- кугыжаныш иктешлыше аттестацийым эртымаш. Идалык еда кокла шот дене школым 300 еҥ медаль дене тунем пытара. Туныктышо- влаклан профессионализмышт, усталыкышт, пашаштлан ӱшанле улмыштлан кугу таум каласынем. Тендан аклаш лийдыме пашада кугу деч кугу пагалымашым сула. Ача-ава- влак шкендан кушкын шушо, кугемше икшывыда дене тургыжландарыше жапыште улыда. Чытымашым, тазалыкым тыланем, тек чыла шонымашда шукталтеш, а икшывыдан сеҥымашышт тендан тыршымашланда награде лиеш. Пагалыме выпускник- влак! Тачысе кече гыч те кугыен улыда. Ынде те шкевуя решенийым луктын, илышдам планироватлен кертыда. Шкаланда да шке цельланда ӱшаныза. Поро корныш! –каласен Республикым вуйлатыше.
Фото: 31-ше номеран школ. МариМедиа.
Фото: 31-ше номеран школ. МариМедиа.
