У ий вашеш Кугыжаныш Думын депутатше Светлана Солнцева калыклан приёмым эртарен

У ий вашеш Кугыжаныш Думын депутатше Светлана Солнцева калыклан приёмым эртарен
У ий вашеш Кугыжаныш Думын депутатше Светлана Солнцева калыклан приёмым эртарен. Тудын деке тӱрлӧ йодыш дене вич еҥ миен. Йошкар-Ола гыч пенсионер эмлыме верыште лийме жапшылан коммунал полышлан тӱлымылан перерасчётым ышташ полшаш йодын. Цибикнур гыч ӱдырамаш черле ӱдыржым Озаҥысе реабилитаций рӱдерыш наҥгаяш билетым налаш полшымылан таушташ толын. Медведево район гыч шуко шочшан ава пӧрт йӱлымӧ деч вара илыме вер дене полшаш йодмашым пуэн. Шке жапыштыже тиде ешлан Люльпаныште пӧртым чоҥаш верым ойырымо ыле. Кызыт тудо райрӱдӧ деке лишкырак ойыраш йодеш. Йошкар-Ола гыч пенсионер «Ветеран- влак нерген» федерал законыш вашталтышым пурташ темлен. Изи годым блокадан Лениградыште илыше- влакым Кугу Ачамланде сарын ветеранже- влак радамыш пурташ йодын. Депутат умылтарен: тиде законопроектым Кугыжаныш Думышто ончымо, но расчёт укелан кӧра, тудым кораҥдыме. Морко район гыч пӧръеҥ Светлана Солнцевалан тауштымашым ойлен. Депутат монументым ышташлан архив материалым муаш полшен. Тыгак Рӱдолаш пурымаште стелын уке улмыжо, Кичиер санаторий воктене Шордын тоштемше символжым уэмдаш темлен. Мер еҥым Волжский районысо Пекоза ялыште этнокультурный комплексым ыштыме йодыш тургыжландара. Депутат документым ямдылаш да республикысе, федерал программылашке ушнаш темлен. Южо йодышым вигак виктарен колтымо, молыжым контрольыш налме.

Прошлые выпуски