«Театр кумдык» ончер почылтын
Республикысе тӱвыра министр Константин Иванов Юл кундем округын «Театральное Приволжье» мер проектше радамыште «Театр кумдык» выставкым почмаште лийын. Экспозицийым ямдылымаште тӱҥалтышым республикысе театр пашаеҥ- влакын ушемышт ден сӱрет сымыктыш тоштер ыштеныт. Выставкым почшыла министр палемден: Театр идалык мемнан республикыште нигунамат ок мучашлалт. Марий Элысе театр- влак уэмыт, у проект- влакым шыҥдарат, республикым вияҥдыме верч умбакыже пашам ыштат. Мемнан театрлаште уста режиссёр, сӱретче, хореограф, музыкант- влак тыршат. Росстатын ончыктымыж почеш, калыкын театрыш коштмыж дене Марий Эл Россий мучко нылымше верым налын шога. Ончылно лач Санкт-Петербург, Моско да Севастополь гына улыт. Йошкар-Ола чынжымак театр ола. Экспозицийыш театрлаште тыршыше сӱретче- влакын 150 утла пашаштым вераҥдыме. Нунын коклаште декораций да костюм- влакын эскизышт, спектакльлан макет, театр костюм да реквизит, курчак, бутафорий, спектакль гыч фотосӱрет, художник- влакын усталык пашашт ончыкталтеш. Выставкым тоштерын фодшо гычат произведений- влак пойдарат. «Театр кумдык» ончер декабрь марте пашам ышта.
