Йошкар-Ола калыкын илыме вер да коммунал полышлан тӱлен шуктыдымо парымже 515 миллион теҥгем эртен
Йошкар-Ола администрацийыште калыкын илыме вер да коммунал полышлан парымжым иземдыме йодыш дене черетан пашаче совещаний эртен. Икымше сентябрьлан шотлымаште калыкын тӱлен шуктыдымо парымже 515 миллион теҥгем эртен. Тышке эше электроэнергийлан, газлан да капитально олмыктымылан ак ок пуро. Идалык тӱналтыш гыч тиде парым 54 миллион теҥгелан ешаралтын. Тылзе еда шымлымаш ончыкта: 3-4 процент оласе калык оксам тӱлымӧ деч эре кораҥаш тырша. Тидыже тылзыште кокла шот дене 7 миллион теҥге парымлан ешаралташ амалым пуа. Тидын годымак виктарыше компаний- влакынат ресурсым ситарыше организаций- влак ончылно парымышт кушкеш. Кызыт тӱлыдымо- влакын чотыштым да данныйыштым рашемдымаш кая. Кӧ мут дене ойлымым умылаш ок тырше гын, ресурсым пуымым чарнен, судыш йодмашым колтен, банк карте гыч оксаштым налын, йот элыш каяш чаракым ыштен, погыштым (машинаштым) арестоватлен кертыт. Тышке шуктыдеат, парымым пӧртылташ виктарыше команий дене кутырен келшаш лиеш. Мутлан, парымым ужашын-ужашын тӱлаш, субсидийым возыкташ, моло льгото дене пайдаланаш йӧн уло.
