Марий Эл правительстве самолёт дене калыкым шупшыктымо республикысе программым пеҥгыдемден

Марий Эл правительстве самолёт дене калыкым шупшыктымо республикысе программым пеҥгыдемден
Марий Эл правительстве самолёт дене калыкым шупшыктымо республикысе программым пеҥгыдемден. Тудо «2019-2030-шо ийлаште Йошкар-Ола аэропорт гыч калыкым шупшыктымашым вияҥдымаш» маналтеш. Документ почеш республикысе калыкым самолёт дене чолганрак чоҥештылаш кумылаҥдыме да республикыште транспорт дене пайдаланаш йӧным ыштыме мера- влакым палемдыме. Программылан ик миллиардат 500 миллион теҥге окса пуалтеш. Тушечын тений 42 миллион, шушаш ийын 136 миллион теҥге ойыралтшаш. Документыште тыгак ончыктымо: «Йошкар-Ола» аэропортын Юл кундем округыштат, Россий кӱкшыташтат вияҥаш куатше уло. Географий велым тудо йӧнан верланен, Йошкар-Ола деч тораште огыл, талукышто сай игече ятыр шога, транспорт коштмо корно воктенак улеш, чоҥештен кӱзымӧ да волен шичме годым лӱдыкшо уке, авиаций специалист- влак  ситышын улыт. 2020-шо ий гыч тӱҥалын, кеҥеж жапыште самолёт Симферопольыш чоҥештылаш тӱналеш. Арняш кок гана Санкт-Петербургыш каяш йӧн лиеш. 2021-ше ий гыч кеҥежым Сочиш да Минеральные воды олашке колташ палемдыме. 2024-ше ий гыч вияш рейс Екатеринбургыш, Ноябрьскыш, Нижневартовскыш лийшаш. Правительствын ончылгоч шотлымыж почеш, шушаш ийын 12 тӱжем наре еҥ чоҥештышаш, 21-ше ийыште 29 тӱжем, 24-ше ийыште 53 тӱжемыш шушаш, 2030-шо ийыште 61 тӱжем еҥ марте ешаралтшаш.

Прошлые выпуски