«Талукын студентше» лӱмым кӧ сеҥен налын?

«Талукын студентше» лӱмым кӧ сеҥен налын?
Кыдалаш профессионал образованийым налше эн сай студент- влакым рашемдыме. «Талукын студентше» калыкле премий федерал проект почеш эртаралтеш. Тудо тунеммаште, усталык пашаште, спортышто, самырык политикыште, мер пашаште посна сеҥымашке шушо студент- влакым пален налаш да полышым пуаш  виктаралтын.  Премийын регионысо йыжыҥже кок тур дене эртен. Икымше заочныйжо 27-ше сентябрьыште мучашлалтын. Кокымшо очный турым 3-шо октябрьыште иктешлыме. Заочный турыш 31 йодмаш пурен гын, финалышке 18 йодмашым ойырен налме. Тыге лауреат- влакын лӱмышт пале лийын. Нуным «Студент лидер», Талукын профессионалже,  старостыже, общественникше, уста личностьшо, спортсменже, добровольческий ушемже номинацийлаште палемденыт. Нунын радамыш аграрный колледж гыч Анна Макарова, РМТ гыч Анна Лежнина, транспортно- энергетик техникум гыч Александр Чапаев, Оршанке колледж гыч Денис Смирнов, тушечынак Анна Лютова, Йошкар-Оласе строительный техникум гыч Ирина Захарова, «Добрыня» волонтёр организаций пуреныт. «Талукын студентше» Гран-прим Оршанке колледж гыч Анна Лютова сеҥен налын. Ынде нуно Россий йыжыҥыште республикын чапшым аралаш тӱналыт. Тудыжо Озаҥ олаште 5-ше гыч 9-ше ноябрь марте эрта.

Прошлые выпуски