У Торъял районышто агропромышленный комплекс дене кылдалтше кугу инвестиций проект шыҥдаралтеш
У Торъял районышто агропромышленный комплекс дене кылдалтше кугу инвестиций проект шыҥдаралтеш. Республикым вияҥдыме индивидуал программе кышкарыште «Первый май» колхоз «Шӧрым пуышо вольыкым ончымо пашам вияҥдымаш да шӧр фермым чоҥымаш да уэмдымаш» инвестиций проектым илышыш пурта. Проект почеш инвестицийын кугытшо 575 миллион теҥге лиеш. Ял озанлык предприятийлан 38 гектар мландым ойырымо. Пашам 2024-ше ий марте ыштен шуктыман. Идалык мучаш марте 504 вуй ушкаллан вӱта чоҥалтеш. Фермым чоҥаш 350 миллион теҥге кая, 37 у пашавер лектеш. Чоҥымо площадкым республикым вуйлатыше Александр Евстифеев ончен лектын. Колхоз вуйлатыше Александр Новиковын мутшо почеш, кызыт 200 миллион теҥгем кучылтмо, 12 пашаверым ыштыме, эше 25 пашавер лекшаш. Бюджетыш тӱлымӧ налог ик миллионат 800 тӱжем теҥгелан кугемын. Тиде озанлык ош-шем урлык тӱкан шолдыра вольыкым куштымо племенной заводлан шотлалтеш. Тушто кум тӱжемат 794 тӱжем вуй вольык уло. Тушечын тӱжемат 450-же- ушкал. Тенийсе 8 тылзыште 363 тонн шылым, 90 наре тӱжем тонн шӧрым ыштен налме. Предприятий шӧрым лӱштымӧ дене республикыште кокымшо верым айла.
