Уста радиожурналист, йӧратыме мурызо Раисия Данилован курымеш чеверласымыжлан ик ият шуэш
Жап пеш писын эрта. Теве тале, уста, чолга радиожурналист, Марий Элын сулло артисткыже Раисия Михайловна Данилован курымеш чеверласымыжлан ик ият шуэш. Тудын нерген поро шарнымаш гына кужу жаплан ушешна кодын. Тидымак шонен, Марий радион икоян коллективше «Эх, Рая, Раисажат...» лӱм дене эфирыште йоҥгалтараш вич передачым ямдылен. Нуно 25-ше июль гыч 29-ше июль марте йоҥгалтыт. Эфирысе жапше 13 шагатат 20 минут гыч, ФМ 106 частоташте лиеш. Сценарийын авторжо-писатель Валентин Осипов-Ярча, Сем дене йӱк режиссёр Олег Крылов келыштарен, текстым Аркадий Сергеев лудын. Тидымат рашемдена: передачыште Раисия Данилован мурымо мурыжым, родо-тукымжын, лишыл еҥже- влакын ойлымыштым кучылтмо.
