Юл эҥер гоч вич меҥге наре кужытыш иймаште Йошкар-Ола пӧръеҥ сеҥышыш лектын

           Юл эҥер гоч ныл тӱжемат 400 метрыш иймаште Йошкар-Ола гыч пӧръен икымше лийын. Чувашийыште Юл гоч ийме дене «Чебсвим-2022» йӱлаш савырныше таҥасымаш эртен. Тушко Российын тӱрлӧ кундемже гыч ияш йӧратыше 101 еҥ толын. Марий Эл гыч кум еҥ миен. Нуно тӱрлӧ дистанцийыште кертмыштым ончыктеныт. Эн кужу дистанцийыште Андрей Поляков чемпион лийын. Тудо ныл меҥгат 400 метрым ик шагатат 15 минутышто ийын эртен. Юл эҥерым тушкыла да мӧҥгешла ийын лектын, абсолютный чемпион лийын. Тиде кужытышто медаль верч 26 еҥ кучедалын. Мемнан вес кок землякнат уда огыл лектышым ончыктеныт. Михаил Иванов 30-39 ияш- влак коклаште кок тӱжемат 200 метрыш иймаште визымше лийын. Денис Жданов тыгаяк кужытыш, но 40-49 ияш- влак коклаште шымше верым налын. А таҥасымашын вучыдымо, нӧ ӧрыктарен куандарышыже Чебоксар гыч 17 ияш Мария Мамаева лийын. Тудын шинчаже лу процентлан гына ужеш. Но тиде сеҥымашыш шуаш чаракым ок ыште. Кок тӱжемат 200 метрым 49 минутышо ийын эртен. Тиде Чувашийын шке шотан неофициальный рекордшо.
             Фото: Андрей Поляков, «Чебсвим» пресс-служба.

Прошлые выпуски