Юрий Зайцев Шернур районысо Купсола ялыш уста мӱкш ончышо да шуко шочшан ешын озаже Сергей Шабдаров деке миен

         Марий Элым вуйлатышын пашажым шуктышо Шернур районысо Купсола ялыш миен да  уста мӱкш ончышо да шуко шочшан ешын озаже Сергей Шабдаров дене лийын. Тудо кодшо ийын социал контрактым налын. Сурт озан мутшо почеш тудо шукертсек мӱкшым онча. Кызыт эргыже- влак тиде пашашке ушненыт, а кодшо ийын «Шке озанлыкым виктарымаш» корно дене 100 тӱжем теҥгеаш социал контрактым налын. Кызыт тудын кок отарже уло, тушто эргыже- влак тыршат. Юрий Зайцев палемден: тений икымше июль гыч социал котрактын кугытшо ешаралтеш. Посна амалкалче пашам шукташ 350 тӱжемым, озанлыкым виктараш 200 тӱжем теҥгем пуат. Тиде пеш сай полыш. Шабдаровмытын мӱйышт ик гана веле огыл конкурслаште сеҥыше лийын, а Сергей шкеже «Марий Элын эн сай мӱкшызыжӧ» конкурсышто сеҥыше лийын. Кок ий ончыч тиде еш Россий кӱкшытан «Талукын ешыже» конкурсышто сеҥен, Президент Путинын Указше дене Татьяна ден Сергей Шабдаровмытлан «Родительская слава» орденым кучыктымо. Эрге- влакат Российысе конкурслаште сеҥыше улыт. Татьяна эше «2021-ше ийын педагогшо» медаль дене палемдалтын. Марий Элым вуйлатышын пашажым шуктышо шокшын вашлиймылан тауштен да шумо кӱкшытыштӧ шогалде ончыко каяш тыланен.
             Фото: Марий Элым вуйлатышын организаций да аналитик виктемже.

Прошлые выпуски