Йошкар-Оласе 14-ше гимназийым олмыктымо пашам 96 процентлан шуктымо

Йошкар-Оласе 14-ше гимназийым олмыктымо пашам 96 процентлан шуктымо
             Йошкар-Оласе 14-ше гимназийым олмыктымо пашам 96 процентлан шуктымо. Рӱдӧ олаштына школ инфраструктурым модернизироватлыме паша «Самырык тукым да йоча- влак» калыкле проектлан кӧра умбакыже шуйна. Тений ныл школым капитально олмыктымо паша авалтен. Кумытыштыжо – 14-ше гимназийыште, 16-шо ден 23-шо школышто тӱҥ пашам у тунемме ий тӱҥалтышлан мучашлаш тыршат. 27-ше номеран школышто 2027-ше ийын февраль марте шуйна.
             Йошкар-Ола ола округым вуйлатыше Евгений Кузьмин ден ола мэрын пашажым шуктышо Антон Трудинов 23-шо школ ден 14-ше гимназийыште капитально олмыктымо пашан кузе  кайымжым тергеныт. Евгений Кузьмин 23-шо школышто лийын. Тушто паша мучашыш лишемеш. Увер стенд- влакым вераҥдаш да генеральный уборкым ышташ кодын. Тыгак фасадым вашталтыме паша шуйна. Тидыже тургыжландарышаш огыл. Тудо тунемме процессым ок тӱкӧ,- палемден Евгений Кузьмин.
             14-ше гимназийыште шуктымо пашам Антон Трудинов терген. Олмыктымашын эн неле ужашыже шеҥгелан кодын. Школ 96 процентлан ямде. Тыштат иканаште фасадым тӧрлымӧ паша кая. Тиде кечылаште тротуар ден корнылам асфальтироватлыме. Школ йыр саварым вераҥдаш тӱналме. Класслаште мебель ден оборудованийым шындылыт. Паша вашке мучашлалтеш да уэмдыме тӧнеж- влак шке тунемшышт ден туныктышыштым куанен вашлийыт,- падемдат ола администрацийыште.
                Фото: Йошкар-Ола администраций.

Прошлые выпуски