Йошкар-Олаште «Марий Эл» Ареным» чоҥен пытараш шонат
Йошкар-Олаште «Марий Эл» Ареным» чоҥен пытараш шонат. Тиде пашан кызыт кузерак кайымыже нерген спорт-туризм министр Лидия Батюкова каласкален. Тудо ушештарен: манежым 2012-шо ийыште чоҥаш тӱҥалме, 2015-ше ий декабрьыште икымше йыжыҥжым мучашлыме. Тунамак объектым пашаш колтымо. Но кугыжаныш чоҥымо надзор инспекцийын заключенийже почеш шуко йодыш кодын. Мутлан, тушко 168 еҥым гына пурташ лиеш, тыгак трибунылашке ончаш толшо- влакым пурташ ок лий. Нине йодышлам вес йыжыҥым чоҥымеке гына виктараш лиеш. Но окса укелан кӧра паша 8 ийлан кучалтын. Решений Федераций Советыште Марий Элын кечыже- влакым эртарыме годым гына лектын. Тений республикысе чоҥымаш министерствылан проект да смета документацийым тӧрлаш тенийлан да план почеш 2025-ше 26-шо ий- влаклан оксам ойыраш палемдат. Тиддеч вара оксам ойыраш йодмашым Россий спорт министерствыш колтат. Йодышым Юрий Зайцев ден Федераций Совет контрольышто кучат, палемден Лидия Батюкова. Чоҥымашын кокымшо йыжыҥыштыже Россий да регион- влак кокласе кӱкшытан таҥасымаш- влакым эртараш, телым куштылго атлетике да футбол дене спортшкол- влаклан занятийым эртараш йӧн лектеш. Тунам зданийыш ончаш толшо- влак дене пырля ныл тӱжемат 394 еҥым пурташ лиеш. Инфраструктурыжат кумдаҥшаш. Тушто унагудым, кафем, спорт ямдылалтмаш рӱдерым, врач да физкультура диспансерым вераҥдаш шонат.
Фото: Лидия Батюкова ВК.
Фото: Лидия Батюкова ВК.
