Куженерыште у хоккей площадкым почмо

Куженерыште у хоккей площадкым почмо
              Марий Элым вуйлатышын кӱштымыжӧ почеш Куженерыште у хоккей площадкым почмо. Тудым чоҥашлан оксам ойырымо нерген решенийым тудо эртыше ийын августышто луктын ыле. Паша дене Куженер районыш мийымыже годым тудын деч площадкым чоҥаш полшаш йодыныт ыле. Тудо шонымашым сайлан шотлен. Теве кызытсе жаплан келшыше мотор хоккей коробка пашам ышташ тӱҥалын, Тудо яра ок шого манаш лиеш. Асфальт шартышым вашталтыме, чапле бортым шогалтыме, вургемым вашталтыме шокшо вер уло, тулым пуртымо, кастене сем йоҥга. Чылаже ныл миллионат 500 тӱжем теҥгем кучылтмо. Арняш ныл гана тушто «Заряд» хоккей командын ямдылалтмашыже эрта. Профессионал команде- влак коклаште чӱчкыдын вашлиймаш- влак эртат, хоккеист- влак уло республике гычат толыт. «Заряд» командыште 25 еҥ модеш, нуно тӱрлӧ ийготан улыт. Но тӱҥ шотышто 50 ияш деч кугурак спортсмен- влак улыт. Каныш кечын да кастене мунчалташ изижат, кугужат погынат, лишыл ялла гычат толыт. Республикым вуйлатыше спортсмен- влак дене мутланен да сеҥымаш- влакым тыланен. А нуныжо вуйлатышым совым рӱж кырен, «Тау!» шомак дене ужатеныт.
             Фото: Марий Элым вуйлатышын  администрацийжын увер дене пашам ыштыше пӧлкаже.

Прошлые выпуски