Йошкар-Оласе сквер Павел Глезденёвын лӱмжым нумалаш тӱҥалеш
Республикым вуйлатышын эртарыме Правительствын заседанийыштыже тыгак Йыван Кырла урем воктене верланыше скверым тӱзландарыме нерген ойлымо. Правительстве председательын икымше алмаштышыже Михаил Васютин палемден: тений республикына 100 ияш лӱмгечыжым пайремла. Тӱҥ мероприятий- влак радамыште марий калыкын 11-ше погынжо лийшаш. Тудым октябрьыш кусарыме. Мероприятий радамыште тыгак Йыван Кырла уремысе скверлан марий сотемдарыше, литератор да этнограф, марий сылнымут да шанче литературылан негызым пыштыше, икымше марий газетым негызлыше чолга еҥ Павел Петрович Глезденёвын лӱмжым пуаш ыштыме. Михаил Васютин тидымат каласен: тиде скверыштак Марий Элын 100 ияш лӱмгечыжлан пӧлеклалтше монументым ышташ кӱлеш. Тудым вес ийлан палемдыме.
