8 тӱжем утла туныктышо пенсийым ончылгоч налеш
Эрла туныктышо- влак шке профессионал пайремыштым палемдат. Марий Элыште 8 тӱжем утла педагог пенсийым ончылгоч налеш. Педагог- влаклан пенсийым ийгот шумеке огыл, а посна стажым поген шуктымеке, палемдат. Марий Элыште ийготыш шуде пенсийым 8 тӱжемат 18 еҥ налеш. Нунын кокла гыч шукыракше ӱдырамаш улыт- 6 тӱжемат 833 еҥ, пӧръеҥ туныктышо- влак шагалрак улыт- тӱжемат 185 еҥ. Пенсийын кокла кугытшо 11 тӱжемат 663 теҥге. Ятыр туныктышо пенсий стажым погымекат, умбакыже пашам ышта. Тыгайже кызыт республикыште ныл тӱжемат 640 еҥ уло. Ончылгоч пенсийым налаш 25 ий туныктымо стаж лийшаш. 2019-ше ий гыч федерал закон дене келшышын, пенсийыш лекме шотышто вашталтыш лийын. Пенсий ийгот кугеммылан кӧра, туныктышо- влакынат пенсийыш лекме ийготышт вашталтеш да вич ийлан ешаралтеш. 2019-ше да 2020-шо ийыште пенсий стажым поген шуктышо- влаклан, у пенсий ийгот деч куд тылзылан ондакырак пенсийым палемден кертыт.
