«У старт. 55+» проектын кумшо тургымжо тӱналеш

«У старт. 55+» проектын кумшо тургымжо тӱналеш
Чавайн лӱмеш калыкле книгагудышто кугурак тукымлан тӱвыра да шинчымашым пуышо «У старт. 55+» проектын кумшо тургымжо тӱналеш. Тушко рушарнян, 6-шо октябрьыште погынат. Книгагудын пашаеҥже- влакын мутышт почеш, кажне еҥлан, поснак канышыш лекмеке, тазалыкым да илышым арален кодаш манын, уш-акыллан да кап-кыллан пашам ыштыктыман. Тиде проект икгай шонымашын еҥ- влак дене пырля жапым эртараш, усталык пашам шукташ, тӱрлӧ теме дене шинчымашым пойдараш да уло куатын илаш йӧным пуа. Проектыш ушнымеке, кугурак ийготан еҥ- влак жапыштым пайдалын да оҥайын эртарен кертыт. Нунылан тыгай корно- влак дене пашам ышташ темлат: Мыйын марий кундемем, Интеллектуал кумдык, Таза лий, Англичанла ойлена, Усталык шонанпыл, Технологий шинчымашым пойдарымаш. Тыгак кок клуб пашам ышташ тӱҥалеш: поэзий дене кылдалтше «Вдохновений» да путешествий корно дене «Марий Эл мучко да моло вереат».

Прошлые выпуски