Туныктышо- влакым шушаш пайремышт дене республикым вуйлатыше саламлен

Туныктышо- влакым шушаш пайремышт дене республикым вуйлатыше саламлен
     Республикым вуйлатыше Александр Евстифеев республикысе туныктышо- влакым лишем толшо профессионал пайремышт дене саламлен. Педагог- влак ик эн пагалыме еҥ улыт. Тиде профессийын кӱлешлыкшым умылен, Александр Евстифеев, тудо шкежат 20 ий туныктышылан ыштен, правительстве пӧртыш эн уста туныктышо- влакым ӱжын. Эн ойыртемалтшыже- влаклан кӱкшӧ наградым шке кучыктен. Ик эн поро профессийым ойырен налше еҥ- влак кугу пагалымашым сулат. Туныктышо- влакынат туныктышышт уло. Те нуным шарнеда. «Мыйын туныктышем сай лийын» манше еҥ-влак пиалан улыт. Кажне еҥын йӧратыме туныктышыжо уло. Нуно шӱм- чонышто поро кышам коденыт да профессийым, пӱрымашым ойырен налмаште полыш кидым шуялтеныт. Туныктышын кечынже поро шомак туныктымо системыште тыршыше 10 тӱжем еҥлан йоҥгалтеш. Тиде уста специалист- влакын тичмаш армийже манаш лиеш. Кызыт калыкле проект- влак чолган шыҥдаралтыт. Нуно калыкын илышыжым саемдымашке виктаралтыныт. Тушечын кокытшо «Образований» ден «Демографий»- туныктымо системым вияҥдаш полшышаш улыт. Республике проектлан лектышыжым кызытак шижеш, манаш лиеш. Йоча сад- влак, 
школ чоҥалтеш. Консолидированный бюджетын чырык ужашыже туныктымо пашалан ойыралтеш. Шергакан педагог- влак! Тендан пашам йӧратымыда деч йочана- влакын ончыкылыкышт шога, кумданрак ончалаш гын, элнан ончыкылыкшо. Вашлиймаш мучашыште Александр Евстифеев эн ойыртемалтше туныктышо- влаклан пеледыш аршашым да сулен налме наградым кучыктен. «Марий Элысе образованийын сулло пашаеҥже» Чап лӱмым Йошкар-Оласе йоча сад гыч кугурак воспитатель Татьяна Дьяконова, 14-ше гимназийын туныктышыжо Елена Земскова, Морко посёлкысо 6-шо школын туныктышыжо Надежда Михайловалан пуымо. Марий Эл Правительствын Чап грамотыжым Морко районысо Унчо школ директор Сергей Григорьев, Советский посёлкысо 3-шо школын туныктышыжо Ольга Костюнина да Медведево районысо автодорожный техникумын туныктышыжо Геннадий Орлов налыныт. Главан тауштымашыж дене Семёновка селасе 21-ше школын туныктышыжо Ольга Васенина, Медведевысе кокымшо йоча садын воспитательже Лариса Голобородько, Йошкар-Оласе 4-ше кастенсе школын туныктышыжо Наталья Садовина, Семёновкысо школ-интернатын туныктышыжо Юрий Сельдюков, МарГУ-н кафедрыжым вуйлатыше Елена Карташовам палемдыме.

                   Туныктыш министерстве республикысе эн сай туныктышо- влаклан ик миллион теҥге оксам ойыра. Таче пайрем вашеш туныктыш да шанче министр Наталья Адамова профессионал мастарыкым ончыктымо конкурсышто сеҥыше- влакым саламла. Премий туныктымо пашаште  сай лектышым ончыктышо эн уста туныктышо- влаклан пуалтеш. Министерствын ончыктымыж почеш тений сеҥыше радамыш логалыныт: Медведевысе кокымшо номеран школышто тӱҥалтыш класслам туныктышо Татьяна Анисимова, Козьмодемьянскысе «Дарование» школ-интернатыште марий йылмым туныктышо Татьяна Горшкова, Волжск оласе 5-ше номеран школышто музыка урокым вӱдышӧ Ольга Дарьина, Йошкар-Оласе Александрова лӱмеш 11-ше лицейыште биологийым туныктышо Наталья Нилова, Курык марий районысо Виловат школышто тӱҥалтыш каласслам туныктышо Елена Шалаева. Эн уста туныктышо- влаклан 200 тӱжем теҥге премий кажне ийын туныктышын кечыж вашеш пуалтеш. Конкурсыш кум ий деч шагал огыл школышто пашам ыштыше туныктышо ушнен кертеш.

Прошлые выпуски