Республикым вуйлатыше «Театральное Приволжье» фестивальын спектакльжым ончен
Теҥгече калыкле президент сымыктыш школышто «Театральное Приволжье» фестивальын регионысо йыжыҥыштыже сеҥышыш лекше спектакльын трансляцийже лийын. Фестиваль Юл кундем округышто Президентын полномочный представительже Игорь Комаровын тӱналтышыже почеш эртаралтеш. Мероприятийым Александр Евстифеев почын. Республикым вуйлатыше погынышо- влакым саламлышыла ушештарен: тенийсе ий Элыштына Театр идалык семын эрта. Тудым почмаште полпред Игорь Комаров лийын да Юл кундем округышто «Театральное Приволжье» фестивальым эртараш темлен ыле. Марий Элна округышто ик эн ончыч фестивальын регионысо йыжыҥжым эртарыш. Оргкомитет республикысе да Киров оласе йоча да студент театр- влакын 16 спектакльыштым ончен лектын. Икымше октябрьыште фестивальын кокымшо йыжыҥже тӱҥалын. Тушто округысо регионлаште сеҥышыш лекше спектакль- влакын видеоверсийышт ончыкталтеш. Кумшо иктешлыше йыжыҥже ноябрьыште лийшаш. Марий Элыште уло мо дене кугешнаш: куд профессионал театр да филармоний пашам ыштат. Кодшо ийын лектышыже почеш Республике театрыш калыкын коштмо чот дене Юл кундемыште икымше, Россий мучко нылымше верым налеш. Теҥгече Юл кундем округысо ончышо- влак Республикысе тӱвыра колледжын 4-ше курсыштыжо тунемше- влакын шындыме «Мой бедный Марат» спектакльым онченыт. Тудо регионысо йыжыҥыште сеҥышыш лектын ыле. Режиссёржо Олег Иркабаев. Тылзе мучко театрым йӧратыше- влак самырык артист- влакын шындыме 28 спектакльым ончен кертыт. Полпредын пресс-службыжын увертарымыж почеш, «Театральный Приволжье» фестивальыште сеҥыше- влак у спектакльым шындаш 200 тӱжем теҥге гыч налыт. Кокымшо верлан 140, кумшылан 100 тӱжем теҥге пуалтеш.
