Кажне йочалан 10 тӱжем теҥгем
Таче кече гыч Российыште коронавируслан кӧра увертарыме пашадыме кече-влак мучашлалтыныт. Но эпидемий ваштареш кучедалмаш умбакыже шуйна. Тидын нерген теҥгече Российын президентше Владимир Путин увертарен да тыгак ешарен: регионлаште чарыме режим гыч лекме радамым верысе вуйлатыше-влак палемдышаш улыт. Россий президент тыгак неле илыш ситуацийышке логалмылан кӧра икмыняр категорий граждан-влаклан ешартыш окса полышым пуымо нерген палемден. Тыге, мутлан, 3 гыч 16 ияш марте кажне йочалан ик гана 10 тӱжем теҥге дене тӱлаш палемдыме. Тидлан Кугыжаныш услуго портал але Пенсий фондын сайтше гоч йодмашым гына возаш кӱлеш. Тиде оксам июнь гыч тӱлаш тӱҥалыт. Йодмашым ончымо жап 5 кече шуйна, вара кум кечыште оксам колтышаш улыт.
