Ял озанлык министрын алмаштышыже кӱлешан ял озанлык да кочкыш сатум эскерыме шотышто Российысе оперативный штабын заседанийыштыже лийын
Республикысе ял озанлык министрын алмаштышыже Андрей Кондратенко Российын ял озанлык министрже Дмитрий Патрушевын эртарыме кӱлешан ял озанлык да кочкыш сатум эскерыме шотышто оперативный штабын черетан заседанийыштыже лийын. Министрын мутшо почеш, лишыл жапыште экономикын тӱрлӧ отрасльже чарыме режим гыч эркын лекташ тӱҥал кертеш. Ял озанлык, кол озанлык комплекс, пищевой да перерабатыватлыше промышленность пашаштым чарен огытыл. Чарымашым кораҥдымаш ял озанлык сатум ыштен лукшо- влакымат писештарен кертеш. Сандене АПК предприятийлаште профилактике мерым пеҥгыдемдыме нерген ончылгоч шоналташ кӱлеш. Тиддеч посна мероприятийыш ушнышо- влак шошо ага пашан кузе кайымыже нергенат ойленыт. Пасушко тымарте 58 субъектыште лектыныт. Сибирь да Уралысе икмыняр регионышто, кечывалвел кундемлаште тений ятырлан ондак ӱдаш лектыныт. Кечывалвел, Йӱдвел Кавказ да Рӱдӧ федерал округлаште 55 процент кумдыкышто пырчым вераҥденыт. Дмитрий Патрушев ял озанлык министерствын регион- влак дене пырля лекше йодыш- влакым виктарен колташ да полшаш ямде улмыжо нерген увертарен.
