Республикым вуйлатыше Йошкар-Олаште чоҥышаш вер- влакым ончен савырнен

Теҥгече Марий Элым вуйлатыше Александр Евстифеев Йошкар-Ола ола мучко паша дене коштын савырнен. Тудо кучылтдымо, но тушто шуко пачеран пӧртым да социал объект- влакым чоҥаш лийше мланде участке- влакым ончен лектын. Тиддеч ончыч тудо Олан мэрже Евгений Масловлан тыгай кумдык- влакын перечньыштым ышташ темлен ыле. Йошкар-Олаште ямде инфраструктуран микрорайонлаште икмыняр яра вер уло. Тушто илыме верым чоҥаш лач келшен толеш. Республикым вуйлатыше «Звёздный» микрорайоныш миен. Тушто шуко пачеран пӧрт- влакым вич ий ончыч чоҥымым чарненыт, южо объектшым мучашлыме огыл. Александр Евстифеев тиде кумдыкым ончыкылыкан манын, тудым вияҥдаш да илыме верлам, тунемме тӧнежлам чоҥаш кӱштен. Тудо тыгак олан рӱдӧ да эҥер вес могыр ужашлаштыже лийын. Соловьёв, Павлов, Тургенев да Репин урем- влак коклаште шуко пачеран пӧрт- влакым чоҥымашым планыш пуртымо. Республикысе Йоча клинический эмлыме вер воктене вертолёт площадкым чоҥаш лийме нерген мутланыме. Санитар авиацийлан тудым чоҥымаш тенияк тӱналшаш.

Прошлые выпуски