«Элнан сарзе историйыштыже Российын регионжо- влак» Россий кӱкшытан шанче-практик конференций пашажым умбакыже шуен
Теҥгече Йошкар-Олаште «Элнан сарзе историйыштыже Российын регионжо- влак» Россий кӱкшытан шанче-практик конференций пашажым тӱналын. Тудым торжественно Калык- влакын келшымаш пӧртыштышт почмо. Участник- влак тӱрлӧ курымласе конфликтлам, сар событийлам сылнымутышто, тӱвыраште, сымыктышыште кузе ончыктымым каҥашат. Конференцийыште Российысе 21 регион гыч 150 еҥ участвоватла. Марий Элым вуйлатыше погынышо да мероприятийым ямдылыше- влакым саламлен да палемден: каҥашыме тӱҥ тема Икымше тӱнямбал сар дене кылдалтын. Тудо кугу геополитик вашталтыш деке конден. Тений тудын тӱналмыжлан 110 ий темын. Мемнан элыште тиде сарлан тӱткышым шагал ойыреныт. Элысе шуко тӱрлӧ калыкын подвигше мондалтмашке шуын. Пытартыш ийлаште гына историк- влакын тыршымыштлан кӧра шанче интерес кугемын.- каласен Республикым вуйлатыше. 2025-ше ийыште Кугу ачамланде сарыште сеҥымылан 80 ий темеш. Тидын нерген Президент эше 2023-шо ийыштак ойлен да ямдылалтме шотышто Указым пеҥгыдемден. Шанче-конференций 2019-ше ий годсек эртаралтеш. Тудо ачамландынан историйжым шояклен ончыктымо ваштареш виктаралтын.
Фото: Марий Элым вуйлатышын администрацийжын увер дене пашам ыштыше пӧлкаже.
Фото: Марий Элым вуйлатышын администрацийжын увер дене пашам ыштыше пӧлкаже.
