Эрла Марий Мер каҥашын шошымсо форумжо тӱҥалеш
Эрла Республикысе мер-политик рӱдерыште Марий Мер каҥашын шошымсо форумжо 9 шагатлан тӱҥалеш. Тудо Мер Каҥашын 30 ийжылан пӧлеклалтеш. Тушко молгунамсе семынак каҥашын еҥже- влак- Марий Элын активше, марий калыкын тӱшкан илыме кундемла гыч- Моско, Санкт-Петербург, Татарстан, Башкортостан, Киров ден Угарман областьла, Пермь край, Одо кундем, Хант-Манси автоном округ гыч, Марий Элын тӱрлӧ районлаже еҥ- влак толыт. Форумын кышкарыштыже «Мер илыш объектив гоч фотоончер» пашам ышташ тӱҥалеш, марий мер толкынын вияҥ толмыж нерген «Марий Эл» ГТРК-н фильмже ончыкталтеш, «Марий калык погын-влак(1992-2020)» книган презентацийже эрта, мер илыш нерген доклад-влак йоҥгат. Мер Каҥаш пеленысе Кугырак каҥаш шке погынымашыжым эртара. Форум пайрем концерт дене мучашлалтеш. Шке мастарлыкышт дене «Марий памаш», «Эрвел марий» калык ансамбль-влак, «Пеледыш», «Тулпеледыш», Угарман кундемысе «Лекшы выт» фольклор ансамбль-влак, Виче кундем гыч «Шӱдыр» йоча ансамбль», Крым гыч мер еҥ Роза Садовина, Башкортостан гыч Васли Ольош, мурызо-влак Володя Матвеев, Светлана Яндукова, Анатолий Зарецких да Эльвира Трифонова куандарат.
Фото: архив.
