Шошо тӱҥалтыш оласе коммунал службылан эре ятыр пашам луктеш
Шошо тӱҥалтыш оласе коммунал службылан эре ятыр пашам луктеш. Урем корныла да тӱшка вер- влак гыч лумым кораҥдымаш, йӱрвӱд йогымо вынемым эрыктымаш, пӧрт леведышла гыч лум ден ийым кораҥдымаш, верлаште погынышо вӱдым тулен налмаш, корным олмыктымаш- чыла тидым шошым ыштыман. «Город» МУП-ын пашазыже- влак кок смене дене тыршат, улшо чыла техникым уремлашке лукмо. Теле гоч чылаже 210 тӱжем кубометр лумым шупшыктымо. Тидыже кодшо ийысе деч шукырак, паша кызытат шуйна. Декабрьыште лум нормо деч 183 процент наре возын, январьыште лум шагал лийын гын, март тиде ситыдымашым темен. Икымше кок арняштыже гына тылзаш нормо деч 126 процент возын. Корнылаште вӱд погынымо верла гыч, Анников, Водопроводный уремлаште, вӱдым тулен кораҥдат. А кудывечылаште порядкым эскерымаш, леведышла гыч лумым кораҥдымаш- виктарыше компанийын пашаже. Специалист- влак палемдат: игечым эскераш верештеш. Тиде кечылан могай пашам шукташ эн кӱлешан, тугай эн ончыч ышталтеш.
Фото: Йошкар-Ола администраций.
Фото: Йошкар-Ола администраций.
