«Российын Почтыжо» пенсий ден пособий- влакым лач шкетын кондышташ тӱҥалеш
«Российын Почтыжо» пенсий ден пособий- влакым лач шкетын кондышташ тӱҥалеш. Тиде у правил дене келшышын ышталтеш. Тыгай законым Федераций Совет теҥгече пленарный заседанийыште сайлан шотлен. У правил почеш пенсийым кондымым сенатор- влак терген шогаш тӱҥалыт, - воза «Парламент газет». Тидын годым Федераций Советым вуйлатыше Валентина Матвиенко законым каҥашыме годым палемден: оксам кондымо шотышто «Россий Почто» декат вуйшиймаш уло. Ондак кузе Почта пашам ыштен, таче тыге пашам ышташ ок лий,- каласен тудо. Спикерым федераций Советын социал политике шотышто комитетшым вуйлатышын икымше алмаштышыже Александр Варфоломееват поддержатлен. Почтылан у полномочийым пуымо дене ме тудлан калыкын ӱшанжым пӧртылташ темлена, тыгак чын логистикым чоҥыман,- каласен Варфоломеев. Пенсионер- влак вучыдымо нелылык дене ынышт тӱкнӧ манын, у логистикым ыштымешке Почто пенсийым ондак кондышо- влак дене жаплан ойпидышым кылден кертеш. Нуно верым, калыкым сайын палат,- шотла Валентина Матвиенко. Пенсийым кондаш Почтылан шкаланже гына правам пуымашын калык верч тургыжланыме деч посна вес амалжат уло. Икмыняр ий ончыч элна мучко ял да тора верлаште почта пӧлка- влакым кумдан уэмдаш тӱҥалме. Тиде пашалан 2025-ше ий марте федерал бюджет гыч 25 миллиард теҥге оксам колтат, Почта шкежат оксам пышта. Пенсийым кондымо шотышто тудлан полномочийым пуымаш уэмдыме пашам писештарен колташ йӧным ышта. Молан манаш гын, пенсийым кеч-кӧ конда гынат, тудлан кугыжаныш оксан ик тичмашат 17 шӱдаш процентшым тӱла. Тышечын налме парышым Российын Почтыжо у пӧлкалам почаш да улшыжым уэмдаш кучылт кертеш.
