Зелёный Дол- Яранск- Котельнич кӱртньӧ корно варарак чоҥалтеш

Кугыжаныш Думышто ик партий фракцийын погынымашыштыже корно йодышым ончымо. Тушто Российысе кӱртньӧ корно акционер ушем правленийын председательже, генеральный директор  Олег Белозеров лийын. Депутат Светлана Солнцева Зелёный Дол- Яранск- Котельнич кӱртньӧ корным чоҥымо нерген йодышым пуэн. Тиде корным чоҥымаш 2030-шо ий марте кӱртньӧ корным вияҥдыме стратегийын у корно линий перечньыштыже улеш. Кодшо ийын Йошкар-Олаште Российысе чоҥымаш министр Владимир Якушев дене эртарыме совещанийыште 2024-ше ий марте республикым вияҥдыме программым ыштыме ыле. Тушто тиде корно нергенат ойлалтын. Но кызыт тиде пунктым программе гыч лукмо. Олег Белозеровын мутшо почеш 2025-ше ий марте вияҥдыме программын проектше кок ужашлан шелалтеш. Иктыже эн чот кӱлешан, весыже варарак ыштышаш паша. Котельнич марте корным вучышаш лаштыкыш да 2030-шо ий марте стратегийыш пуртымо. Регионлам вуйлатыше- влак дене корнын кӱлешлыкше чарныде каҥашалтеш. Ситуаций вашталтеш гын, проектым программыш пуртат,- каласен российысе кӱртньӧ корным вуйлатыше.

Прошлые выпуски