Икымше гана начар колшо- влак коклаште картинг дене турнир эртен
Йошкар-Олаште икымше гана начар колшо- влак коклаште картинг дене турнирым эртареныт. Организаторжо- влак- Российысе соҥыра- влак обществын регионысо пӧлкаже дене «Картинг» рӱдӧ спорт клуб палемденыт: нунылан тиде йӧршын у опыт лийын. Изи спорт машина дене кудалышташ 8 еҥ кумылжым ончыктен. Эн ончыч нунылан инструктажым эртареныт. Тидыже молгунамсе деч шукырак жапым налын. Молан манаш гын, чыла кидйылме дене умылтараш верештын. Но нелылык лектын огыл. Спортсмен- влакын чыланыштынат водитель правашт уло. Таҥасымаш олимпий системе дене эртен. Таҥасыше- влак ныл еҥ дене кок тӱшкалан шелалтыныт. Финалыш кок еҥ лектын. Нунылан Чап грамотым кучыктымо, но тиде гына огыл, нуно эше багги денат кудалышт онченыт. Уремыште йӱштӧ лийын гынат, таҥасымаш чылалан келшен.
