«Качестван лӱдыкшыдымӧ корно» калыкле проект кышкарыште 270 меҥге утла автомобиль корным олмыктат
Республикыштына «Качестван лӱдыкшыдымӧ корно» калыкле проект кышкарыште 270 меҥге утла автомобиль корным олмыктат. Тений норматив марте регион кӱкшытан 256 меҥге да муниципал кокласе кӱкшытан 20 меҥге кужыт корным норматив марте шуктат. Калыкле проект кышкарыште палемдыме мероприятийым шуктымым Марий Элым вуйлатыше Юрий Зайцев ден чоҥымаш да корно озанлык министр Александр Герасименко каҥашеныт. Министерствым вуйлатыше палемден: тений регион да муниципал кокласе кӱкшытан корным норматив марте шукташ ныл миллиардат 200 миллион теҥгем колтымо. Тушечын кок миллиардше- федерал окса. Йошкар-Ола агломерацийын урем-корно сетьшым тӧрлаш тений 448 миллион теҥгем ойырымо. 368 миллион наре теҥгем Киров ден Строитель уремлам ушышо магистральын икымше йыжыҥжым мучашлаш палемдыме. Герасименко тидымат ешарен: тыгак 608 метрыш погынышо 12 кӱвар олмыкталтеш да капитально олмыктымо паша шукталтеш, иктыже – Йошкар-Олаште. Морко районысо Кӧкрем- Петровский корнышто Ировка эҥер гоч кӱварым чоҥаш тӱҥалме. Тудым 2024-ше ийыште ыштен шуктышаш улыт. Алдександр Герасименкон мутшо почеш паша 21 объектыште шукталтеш. Тыгак Красный Мост- Килемар-Шаранга, Звенигово- Шолеҥер- Морко, Звенигово-Памар корным пашаш колташ ямдылат. Республикым вуйлатыше тыге каласен: паша кугу. Сандене шуктышаш жапым кӱрылман огыл.
Фото: Марий Элым вуйлатышын администрацийжын увер дене пашам ыштыше пӧлкаже.
Фото: Марий Элым вуйлатышын администрацийжын увер дене пашам ыштыше пӧлкаже.
