«Калыклан служитлымаш» медальым кучыкташ тӱҥалыт
Марий Элыште «Калыклан служитлымаш» шарнымашан медальым ыштыме. Тудым калыкын тӱҥалтышыже почеш республикысе тӱвыра министерстве учредитлен. Шарнымашан медаль Марий Элын 100 ияш лӱмгечыжлан да мер, политике деятель, Марий Облисполкомын икымше председательже Иван Петрович Петровым шарнымашлан пӧлеклалтеш. Тиде медальым тӱвыраш, сымыктышыш, сылнымутыш, кинематографийыш, шанче да туныктымо пашаш, тӱшка увер средствыш, физкультура да спортыш, калык кокласе кылым вияҥдымашке, исполнительный кучем органын да верысе самоуправлений органын пашашкыже пыштыме надырлан да мер пашам шуктымылан кучыкташ тӱналыт. Наградылан каласыме организаций- влак шке еҥыштым темлышаш улыт. Йодмашым налмаш да наградитлымаш тӱвыра министерствын калык да конфессий кокласе кыл шотышто пӧлкаштыже лиеш.
