Марий Эл деч у сенаторым пеҥгыдемдыме
Таче Марий Эл Кугыжаныш Погын кокымшо сессийым эртарен. Тудын повесткышкыже ныл йодышым пуртымо. Депутат- влак Юрий Минаковым марий парламентын почётан председательжылан пеҥгыдемденыт. Тыгак депутат- влак шукырак йӱк дене Федераций Советын аппаратшым вуйлатыше Сергей Мартыновым республике деч сенаторлан сайленыт. Тудо тиде должностьышто Наталья Дементьевам вашталтен. Ушештарена: Марий Эл деч кокымшо сенатор Константин Косачёв пашам ышта. Тудо Федераций Советыште тӱнямбал паша шотышто комитетым вуйлата. Кугыжаныш Погыным вуйлатыше Анатолий Смирнов у сенаторым саламлен да республике верч лектыш дене пашам ышташ тыланен. Тиддеч посна республикыште мировой судья- влакым палемдыме южо йодыш- влак нерген пунчалын проектшым каҥашеныт.
