Округышто электроэнергий шотышто лӱдыкшыдымылыкым ыштыме йодышым каҥашыме
Марий Элым вуйлатыше Александр Евстифеев Юл кундем округышто Россий Президентын полномочный представительже пеленысе Советын видеоконференций йӧн дене эртарыме заседанийыштыже участвоватлен. Заседанийым полпред Игорь Комаров эртарен. Вашлиймашын тӱҥ темыже округысо регионлаште энергетик лӱдыкшыдымылыкым ыштымаште федерал кучемын исполнительный органже ден субъектлан кугыжаныш кучем органышт коклаште вашкылын пайдалыкшым кугемдыме дене кылдалтын ыле. Игорь Комаровын мутшо почеш, округышто куатле да вияҥше топливно- энергетик комплекс уло. Тӱҥ задаче- олтымо тургымым эшкык деч посна эртарен колтымаш да объект- влакым терроризм деч аралымаш. Марий Элыште топливно-энергетик комплексын 39 объектше уло. Кучем- влак коклаште кыл шотышто йодыш уке. Электросеть- влакым чаткан кучаш 7 инвестиций программе шыҥдаралтеш. Нунын кышкарыште тоштемше оборудованийым вашталтат, тыглай воштыр- влакым изолированный электровоштыр дене алмаштат, южлиний- влакым школ да йоча сад кундемла гыч ӧрдыжкӧ луктыт да электроэнергетикын у объектше- влакым чоҥат. Энергетик лӱдыкшыдымылыкым ышташ да вучыдымо ситуаций ынже лий манын, юж линийлам шупшмо кумдыкым кумдаҥдат, чодыра гоч шуйнышыжым кушкыл да шӱкшак деч эрыктат. Экшыкым писын кораҥдаш ремонт бригаде- влакым ыштыме, тренировко эртаралтеш.
