Композитор- влак Яков ден Андрей Эшпаймытлан чапкӱн эн сай проектшылан конкурсым увертарыме

Композитор- влак Яков ден Андрей Эшпаймытлан чапкӱн эн сай проектшылан конкурсым увертарыме
            Йошкар-Олаште композитор- влак Яков ден Андрей Эшпаймытлан чапкӱн эн сай архитектурно-художественный концепцийлан конкурсым увертарыме. Тидын шотышто приказым правительстве вуйлатышын алмаштышыже- тӱвыра министр Константин Иванов пеҥгыдемден. Документ дене келшышын монумент Марий кугыжаныш филармоний ончылно Изи Какшан эҥер сер могырым площадкыште верлана. Пеҥгыде да шуко жап чытыше материал гыч ыштыме чапкӱ ача ден эргыжын скульптура сӱретыштым ончыктышаш. Тушко посна авторат, усталык коллектив- влакат ушнен кертыт. Йодмаш ден конкурслык материалым 7-ше май марте налыт. Конкурсым 15-ше май марте иктешлышаш улыт.
             Композитор, хормейстер, фольклорист, марий профессионал семым негызлыше кокла гыч иктыже Яков Андреевич Эшпай 1890-шо ийыште шочын да 1963-шо ийыште илыш дене чеверласен. Эргыже Андрей Яковлевич Эшпай совет да Россий композитор, пианист, педагог 1925-ше ийыште шочын да 2015-ше ийыште ош тӱня гыч каен. Яков Эшпайын лӱмжым Марий филармоний ден оласе ик урем нумалыт. Андрей Эшпайлан 2022-шо ийыште Йошкар-Олаште бюстым почмо.
            Фото: Кидшер сайт.

Прошлые выпуски