Йошкар-Олаште у йоча сад вашке ямде лиеш
Республикым вуйлатыше Александр Евстифеев Йошкар-Олаште йоча садым чоҥымо пашам шке терген лектын. Сентябрь тӱҥалтышыште гына тудо вигак кок йоча садым почмаште лийын ыле. Тыгай сомыл «Демографий» проектлан кӧра ышталтеш. Кызыт у «Интеграл» микрорайонышто тыгаяк у, кызытсе жаплан келшыше садик чоҥалтеш. Тудо 320 йочалан келыштаралтеш. Александр Евстифеев чыла кӱлешан пӧлем-влакым ончен лектын, чоҥышо- влак дене мутланен, чыла рашемден йодыштын: кунам шокшым пуат, могай мебелым налаш кӱлеш да тулеч молат. Мемнан ончылно задаче- тений декабрьыште тиде садым пашаш колтымаш,- каласен тудо. Евгений Масловын мутшо почеш, окса жапыштыже толеш, мебель ден оборудованийлан заказым пуымо. Декабрьыште пашам шуктымо дене чылам саламлена,- манын тудо. Кызыт отделке мучашлалтеш да вара чиялташ тӱналыт. Тиде садикыште икмыняр пӧлемжым ясле группылан пуаш палемдыме.
