Марий Элым вуйлатышын приёмжо

          Нежныр селаште спорт площадкым чоҥат, а Йошкар-Олаште кудывечым олмыктат, Медведево районышто Поланур ял деке корным ыштат. Теҥгече Марий Элым вуйлатыше калыклан приёмым эртарен. Йодыш- влак тӱрлӧ лийыныт. Йодышым пуышо- влак кокла гыч иктыже- Нежнырыште илыше Наталья Кропинова. Тудо кызыт ашнаш налме 9 йочам ончен кушта, а чылаже ашнаш налме 25 йочам йол ӱмбаке шогалтен. Тудо Юрий Зайцев деч пӧрт воктене оборудованиян изирак спорт да модмо площадкым чоҥаш полшаш йодын. Килемар район администрацийым вуйлатыше Татьяна Обухова умылтарен: площадкын акшым ончылгоч шотлен лекме- 120 тӱжем теҥгеш шуэш. Тушто «Угловой» спорт комплексым вераҥдаш палемдыме. Тиде рончыман кӱртньӧ конструкций. Республикым вуйлатыше тидым ышташак кӱлеш манын. Йошкар-Ола гыч самырык ава Татьяна Пушкина Петров уремысе 4-ше пӧрт воктелсе кумдыкым тӱзаташ йодын. Республикым вуйлатыше умылтарен: пӧрт шуко пачеран, воктене йоча сад уло, сандене тиде кумдыкым келшыше программыш пурташ кӱлеш. Медведево районысо Поланур гыч Надежда Масленникова увертарен: шушаш ийын августышто Поланур ял 30 ияш лӱмгечыжым пайремлаш тӱналеш. Тудо кугу лийшаш, шуко еҥ толаш кумылан, но тушко мийыме корно шӱлыкым луктеш. Республикым вуйлатыше полшаш сӧрен, а Надежда шке велымже Юрий Зайцевым ял пайремыш ӱжын.
             Фото: Марий Элым вуйлатышын  администрацийжын увер дене пашам ыштыше пӧлкаже.

Прошлые выпуски