Марий Элын правительствыже ден «Российысе кӱртньӧ корно- влак» акционер ушем транспорт инфраструктурым вияҥдаш манын кылым кучаш шонат
Марий Элын правительствыже ден «Российысе кӱртньӧ корно- влак» акционер ушем транспорт инфраструктурым вияҥдаш манын кылым кучаш шонат. Республикым вуйлатыше Юрий Зайцев ден Российысе кӱртньӧ корнын филиалже Горький кӱртньӧ корнын начальникше Сергей Дорофеевский пашаче вашлиймашым эртареныт. Юрий Зайцев республикыште кӱртньӧ корно дене коштмо йодыш дене вашкылым шуяш ямде улмо нерген ойлен. Сергей Дорофеевский тиде направлений дене вияҥаш республикын куатше уло манын палемден. Сай лектыш семын кодшо ийын пригородышто пассажирын 18 тӱжем еҥ марте шукеммыжым палемдыме. А торашке- 113 тӱжем еҥ марте. 2021-ше ий дене таҥастарымаште калык 25 да 37 процентлан шукырак кошташ тӱҥалын. Моло регионлашке вагоным ешарен колтымашат шкенжым сулен, республикыш турист поезд- влакын коштмыштат оҥайлан шотлалтеш. Дорофеевский тидымат ешарен: ондак нӧлталме йодыш- влакымат ончен лекме да решатлыме. Коляске дене коштшо- влаклан вокзалым келыштарымаш: ӱлыш кассым ыштымаш, омсам, пӧлем- влак коклаште лондемым келыштарымаш тений шукталтшаш. Мутланымаште пригород поездым талук мучко колтымо йодышымат ончымо. Кызыт тудо телым ок кошт. Йодмаш уло. Сандене тудымат ончен лекме лиеш. Сергей Дорофеевский ӱшаным каласен: эртыше ийын грузым шупшыктымаш дене кугытын шагалеммыжым тений нефтьым перерабатыватлыше заводын продукцийжым шупшыктымо дене ешараш да тӧремдаш лиеш.
Фото: Марий Элым вуйлатышын администрацийжын увер дене пашам ыштыше пӧлкаже.
Фото: Марий Элым вуйлатышын администрацийжын увер дене пашам ыштыше пӧлкаже.
