Марий Йӱштӧ Кугызан резиденцийышкыже кок тӱжем утла еҥ толын каен
У ий да Рошто пайрем жапыште марий Йӱштӧ Кугызан резиденцийышкыже кок тӱжем утла еҥ толын каен. 2022-шо ийыште Шернур районысо Кукнур селасе резиденцийыш чылаже вич тӱжемат 150 еҥ миен. Кочан да Лумӱдырын илыме верыштым ончаш Марий Эл деч посна Чуваш, Киров кундем, Татарстан, Башкортостан республике, Угарман область, Краснодар край, Моско, Санкт-Петербург, Пермь, Калининград, Норильск, Ижевск олала гыч уна- влак толыныт. Ятырже куанымышт нерген ойленыт, ужаш шонымо деч шукыракат ужынна манын палемденыт. Турист- влак ешаралт шогат. Кодшо ийын лектышыже почеш Калыкле турист рейтингыште Марий Эл «Пеҥгыде профи» але «ший» тӱшкашке пурен. Тений турист- влакым эшеат кумылаҥдаш манын Кочан резиденцийжым умбакыже уэмдаш шонат: экспозиций леведышым чоҥаш, улшо оралте- влакым саемдаш, вӱд пуч ден канализацийым пурташ, «Марий зодиак оҥго» аланым тӱзландараш палемдыме. Тушко мияш билетым ончылгоч налаш кӱлеш, молан манаш гын, мияш кумылан- влак ешаралт шогат.
