Марий Элыште кум еҥлан коля йӱштымужо чер пижын

Марий Элыште кум еҥлан коля йӱштымужо чер пижын
             Марий Элыште кум еҥлан коля йӱштымужо чер пижын. Роспотребнадзор виктем кодшо арнялан статистикым ончыктен.  Йошкар-Ола кумдыкышто коля йӱштымужо чер пижме  кокыт да Звенигово районышто ик случайым регистрироватлыме. Кок еҥжылан сурт-коклаште, иктыжлан сад-пакча пашам ыштымыже годым пижын. Эпидемиолог- влак колян шаркалыме инфекцийым пижыкташ огыл манын профилактике мерым шукташ кӱлеш манын шижтарат. Тошто оралтым рончымо, шудым, олымым оптымо, оҥам рончымо пуракан пашам ыштыме годым перчатке ден маскым чийыман, колышо колям чара кида кучыман огыл, чодыраште, пӱртӱсыштӧ каныме годым чара, кечан аланым ойырен налаш кӱлеш, тура кечыйол ГЛПС вирусым вашке пытара. Кочкышым коля пурен кертдыме верыште аралыман, коля тӱкымыжым кочман огыл, кидым мушде кочкаш ок лий.

Прошлые выпуски