Йошкар-Олаште тений проект почеш кок уремым олмыктат

Йошкар-Олаште тений калыкле проект почеш Йошкар- Армий ден Пролетар урем- влакым олмыкташ палемдыме. Кугыжаныш закупко сайтыште Пролетар уремын Вознесенский деч Машиностроитель урем марте ужашыжым, а Йошкар Армий уремын Машиностроитель деч Йыван Кырла урем марте ужашыштым олмыктышаш нерген уверым вераҥдыме. Специалист- влак нине уремысе корнын ӱмбал ужашыжым начарлан шотлат. Верысе значениян Пролетар уремын кужытшо кок меҥге наре погына. Йошкар Армий уремын олмыктышаш кужытшо ик меҥгат 700 метр, кумдыкшо 9 гыч 15 метр марте. Кызыт паша радамым рашемдыме. Март-апрельыште чоҥымо материалым шапашлат. Май тӱҥалтышыште геодезий пашам эртарат. Май пайрем деч вара тошто асфальтым нӱжен налыт, бордюр кӱым кораҥдат. Канализаций вынем- влакым олмыкташ, 21-ше июнь гыч асфальтобетон шартышым тӧремдаш тӱҥалыт. Вара ӱмбал ужашыжым шарат. Тиддеч вара ушнышо корно- влакым да тротуарым олмыктат. Чыла сомыл 5-ше август марте шуйнышаш. Вара газоным шотыш кондат, корно пале- влакым вераҥдат. Сентябрь мучаш марте корным приниматлышаш улыт. Пролетар уремлан 46, Йошкар Армий уремлан 56 миллион теҥге оксам кучылташ палемдыме.

Прошлые выпуски