Приволжский ФОК ноябрьлан ямде лийшаш

Республикым вуйлатыше Александр Евстифеев Волжский районыш мийымыж годым Приволжский посёлкышто физкультура да тазалыкым пеҥгыдемдыме комплексым чоҥымо пашам терген. Тудо муниципал образованийлан у спорт рӱдер лийшаш. Проект почеш тушто бассейнын кок чашыже, спорт зал, кучедалме, тренажёр зал, административный да полышкалыше пӧлем- влак лийшаш улыт. Объектым кызыт марте 70 процентлан ямдылыме Чоҥымаш министр Михаил Степановын мутшо почеш, кӧргыштӧ чыла штукатуритлыме, сантехник пашам шуктымо, канализацийлан, ырыкташлан, вӱдлан пучым пыштыме, кок чашыштыжат пундашыжым, пырдыжшым ямдылыме. Паша график почеш кая. Котельный икымше октябрьлан ямде лийшаш, вара шокшым пуэна, - каласен министр. Воктелсе кумдыкымат тӱзландараш тӱҥалме. Республикым вуйлатыше шижтарен: палемдыме жапым чаткан эскерыман. Тиде кӱлешан объект. Республике 17-18 миллион теҥгем гына кучылтын. 100, вара 145 миллион теҥгем Газпром ойырен. Сандене чыла жапыштыже ыштен шуктыман. Пашам 1-ше ноябрьлан мучашлаш палемдыме.

Прошлые выпуски