Республикым вуйлатыше Марий Турек ден Советский районлаште лийын
Теҥгече Республикым вуйлатыше Александр Евстифеев паша дене Марий Турек район Кугу Карлыган ялысе Тӱвыра Пӧртыш миен. Кызыт тушто «Тӱвыра» калыкле проект почеш уло куатын олмыктымо паша кая. Пӧртым 1973-шо ийыште чоҥымо. Тиде жапыште тудым капитально олмыктымо огыл. 2015-ше ийыште тӧрлаш тӱналме, но окса укелан кӧра пашам чарен шогалтыме. Тений паша уэш воранаш тӱналын. Молан манаш гын, 10 миллион утла теҥге оксам ойырымо. Республикым вуйлатышылан каласкалыме почеш, пырдыжым тӱжвал могырым сӧрастарымаш мучашлалтеш, кӧргыштат пӧлем пырдыж- влакым шымартат, мебельымат налаш тӱҥалме. Александр Евстифеев сценым, кумда залым мокталтен, но эше паша шуко манын, южо сомылжым вашкерак шукташ кӱштен. Республикын лӱмгечыж вашеш тӱвыра министр кугу пайрем программым ышташ сӧра, а правительствын еҥже- влак пашам мучашлымым ончаш толыт,- увертарен тудо. Вуйлатыше тыгак Советский посёлкышто корным ыштыме пашам аклен. Зелёный да Маяковский уремлаште корным олмыктымо. Тушто асфальтым шарыме, тыгыде кӱ дене корно тӱрым пеҥгыдемдыме, тротуар- влакым ыштыме, машинам шогалташ кумдаҥдыме вер да тӱшка транспортыш шичме площадке- влак улыт. Шӱкшакым оптымо контейнерым вераҥдыме площадке- влакымат шотыш кондымо. Куд ий жапыште Советскийыште 26 меҥге кужытыш шуйнышо 28 уремым олмыкташ палемдыме. Шуктымо паша шотышто замечаний лийын огыл.
