Марий Элыште калыкле проект- влак почеш социально кӱлешан 40 объектым капитально чоҥат

Марий Элыште калыкле проект- влак почеш социально кӱлешан 40 объектым капитально чоҥат. Правительство пӧртыштӧ Александр Евстифеевын эртарыме совещанийыште калыкле проект- влакым шыҥдарыме йодыш- влакым каҥашыме. Промышленность, экономически вияҥмаш да торговля министр Дмитрий Пугачёв контракт- влакым ыштыме йодыш нерген ойлен. Тиде пашам кажне арня еда терген шогалтеш. Тенийлан регионысо проект- влакым шыҥдараш чылаже 8 миллиардат 800 миллион теҥге оксам палемдыме. Пеҥгыдемдыме соглашений- влак дене келшышын, тений социально кӱлешан 40 объектыште капитально чоҥымо паша шукталтеш. «Тазалыкаралтыш» проект почеш регионысо ныл проект шыҥдаралтеш.- каласен министр Марина Панькова. Нуно шӱм да вӱргорно, онкологий чер ваштареш кучедалмаш, йоча тазалыкаралтышым вияҥдымаш, тазалыкаралтышыште единый цифра контурым ыштымаш дене кыладлтыныт. 758 миллион теҥгелан медицина оборудованийым налаш палемдыме. Чоҥышаш 17 ФАП гыч 9-ыжлан документаций ямде. Александр Евстифеев ак ынже кӱзен кае манын, оборудованийым вашкерак налаш кӱштен. Туныктыш министр Наталья Адамован мутшо почеш Йошкар-Олаште у школым 70 процентлан чоҥен шуктымо, мебельым, оборудованийым налме, вашке компьютерым налшаш улыт. Волжск оласе школын кокымшо корпусшо 80 процентлан ямде. Йошкар-Олаште, Медведевыште да Руэмыште ныл йоча садым чоҥаш палемдыме. Правительстве председательын икымше алмаштышыже Александр Сальниковын мутшо почеш, капитально чоҥышаш 32 объектлан документацийым ямдылыме, эше 36 объектлан 2022 ий марте ыштен шукташ кӱлеш.

Прошлые выпуски