Республикыште «Йошкар-Ола театральный» фестивальын сеҥышыжым салмалыме церемоний эртен
Республикыште «Йошкар-Ола театральный» фестивальын сеҥышыжым салмалыме церемоний эртен. Йӱла почеш фестивальым петырымаш Театр кечын 27-ше мартыште лийшаш ыле, но Крокус Сити Холлышто лийше терактлан кӧра мероприятийым варарак жапыш кусарыме. Теҥгече фестивальым иктешлымаш да Йыван Кырла лӱмеш калыкле театр премийым кучыктымо торжественный церемоний эртен. Фестивальын Гран-при ден тӱҥ призшым Эрик Сапаев лӱмеш опера да балет театрын «Война и мир» балетше налын. Степан Пектеев тиде театрыштак «Паяцы» опера дене режиссер семын ыштыме эн сай пашажлан палемдалтын. Оперыште эн сай партийлан Майя Рийверс палемдалтын. «Эн сай сценографий» номинацийыште курчак театрын «Йӱксалче» спектакльыштыже пашажлан наградым Сергей Таныгинлан пуымо. Курчак театрыште эн сай рольлан Матвей Андреевын пашажым шотлымо. «Балетыште эн сай партийым» Артём Васильев куштен. Драма спектакльыште эн сай ӱдырамаш рольым Людмила Мансурова ден Марина Воронцова модыныт. «Драма спектакльыште Эн сай пӧръеҥ роль» категорийыште Павел Ефимов сеҥышыш лектын. Тӱвыра колледжын да опера ден балет театрын «Буратино» проектыштым эн сай экспериментлан шотлымо.
Фото: «Кидшер» сайт.
Фото: «Кидшер» сайт.
