Республикыште земский тӱвыра пашаеҥ- влак ик миллион теҥге гыч налыт
Республикыште земский тӱвыра пашаеҥ- влак ик миллион теҥге гыч налыт. Тӱвыра министерствыште ола да район администрацийлам вуйлатыше- влак дене совещаний эртен. Ведомствым вуйлатыше Константин Иванов тӱвыра аланыште кадр потенциалым вияҥдыме нерген ойлен. Тудо ушештарен: шушаш ийын икымше январь гыч «Земский тӱвыра пашаеҥ» у федерал программе пашам ышташ тӱҥалеш. 50 тӱжем марте еҥ илыман илемлашке пашам ышташ куснышо- влак ик гана ик миллион теҥгем налыт. Иванов тидымат ешарен: кызытак отрасльысе кадр йодыш дене пашам ышташ кӱлеш: студент- влак дене пашам ышташ, тӱвыра корно дене тунмаш пураш абитуриент- влакым ямдылыман. Тӱвыра министрын алмаштышыже Игорь Садовин терроризм идеологий ваштареш шогымо шотышто комплексный планым шыҥдарыме нерген ойлен. Тыгай планым луымшо декабрь марте кажне районышто пеҥгыдемдышаш улыт. Совещанийыште тыгак калык усталыкын республике кӱкшытан «Салют Победы» фестивальлан ямдылалтме нерген ойленыт. Тӱвыра министрын алмаштышыже Александр Луничкин увертарен: район ден олалаште калык усталыкын жанрже- влак дене усталык отчёт- влак эртат, пашан да сарын ветеранже- влакын хор ден ансамбльыштын «Шӱмын лӱмжӧ дене, илышын лӱмжӧ дене» фестиваль лиеш. Тыгак «Пушкин карте» дене кылдалтше йодышымат каҥашыме.
Фото: Тӱвыра министерстве.
Фото: Тӱвыра министерстве.
