Российыште Беларусьын тӱвыра кечыже- влак почылтыныт

           Теҥгече Российыште Беларусьын тӱвыра кечыже- влак почылтыныт. Тидын шотышто Марий Элым вуйлатышын пашажым шуктышо Юрий Зайцев уна да республикысе калыкым саламлен. 1997-ше ийын 2-шо апрельыште Россий ден  Беларусь коклаште Союз нерген ойпидышым кылдыме. Российыште Беларусьын тӱвыра кечыже- влакым почмаш волгыдо да шарнаш кодшо событий. Ушемыш пурышо кугыжанышын артистше- влакын гастрольышт лач Марий Эл гыч тӱҥалмыже мемнам куандара. Республикыште илыше- влакым куандараш Калыкле акадмический калык хор, Кугыжаныш куштышо ансамбль, «Песняры» кугыжаныш ансамбль да моло коллектив- влак толыныт. Артист- влаклан усталык кумылым, шокшо кидсовышым,  а ончаш мийыше- влаклан весела кумылым да чон канышым тыланем. Тӱвыра аланыште вашкылна умбыкыжат шуйна манын ӱшанем, - ойлалтеш Республикым вуйлатышын саламлымашыштыже.
             Российыште Беларусьын тӱвыра кечыже дене кылдалтше мероприятий Эрик Сапаев лӱмеш опера да балет театрыште эртен. Уна- влакым Марий Элым вуйлатышын пашажым шуктышо Юрий Зайцевын лӱмжӧ дене Правительстве председательын икымше алмаштышыже Михаил Васютин саламлен. Тиде кечынак Марий Эл да Беларусь филармоний- влак коклаште вашкыл нерген меморандумым пеҥгыдемдыме. Тӱвыра кече- влак кок элын тӱвыра министерствыштын полшымышт дене эртат.
           Фото Евгений Никифоров.

Прошлые выпуски