Шушаш ий мучаш марте 10 тӱжемат пеле квадрат метр кумдык тошто пӧртла гыч калыкым кусарыман

Шушаш ий мучаш марте 10 тӱжемат пеле квадрат метр кумдык тошто пӧртла гыч калыкым кусарыман
Марий Элым вуйлатыше Александр Евстифеев совещанийым эртарен. Тушто тошто да аварийный пӧртла гыч калыкым кусарыме йодышым каҥашыме. Республикыште тиде йодышым виктарен колташ «Илыме вер да оласе кумдык» калыкле проектын регионысо проектше полша. Тудын негызеш «2019-2025-ше ийлаште аварийный илыме вер гыч калыкым кусарымаш» программым ыштыме. Тудым 6 йыжыҥлан шеледыме. Икымше йыжҥыштыже гына- 2019-2020-шо ийлаште 276 верыште илыше 724 еҥым кусараш палемдыме. Тиде сомыллан 350 миллион теҥге колталтеш. Александр Евстифеевын мутшо почеш, тӱҥ пашаже тений да шушаш ийыште рӱдӧ олалан логалеш. Олан мэрже Евгений Масловын мутшо почеш, чыла программым пеҥгыдемдыме. Тений да шушаш ийын 129 илыме верыште илыше 363 еҥым кусараш палемдыме. Чоҥымаш, архитектура, илыме вер да коммунал озанлык министрын сомылжым шуктышо Светлана Павлова муниципал образованийлаште тиде пашан кузе кайымыже нерген ойлен. Мутшо почеш, 10 тӱжемат пеле квадрат метр кумдык гыч калыкым кусарыман. Контракт почеш сомылым Советский район тӱрыс шуктен. Кокымшо верыште- Медведево район. Звенигово районышто 44 пачерлан контрактым ыштыме. Александр Евстифеев ушештарен: пашан кугу ужашыжым вес идалык мучаш марте шуйкалаш ок кӱл, пашам ончылгоч ыштыман. Павлова ешарен: икымше йыжыҥлан контарктын 90 процентше тений идалык мучаш марте пеҥгыдемдалт шушаш. Программыш чылаже, 17-ше ий марте аварийныйлан шотлымо, шуко пачеран 400 пӧртым пуртымо. Тудын кумдыкшо 100 тӱжем квадрат метрыш погына.

Прошлые выпуски