Таче Евсеев лӱмеш калыкле тоштерыште Сибайысе историй да краеведений тоштер гыч «Мирас» ончер почылтын
Йошкар-Олаште таче Евсеев лӱмеш калыкле тоштерын тӱҥ корпусыштыжо Башкортастынсе Сибай историй да краеведений тоштерын фондшо гыч «Мирас» (наследие) ончер почылтын. Ончер проект кум ужаш гыч шога: «Башкир- влакын сурт кӧргышт да кучылтмо ӱзгарышт», «Кызытсе декоративно-прикладной сымыктыш» да «Курымлан поянлыкше». Чылаже 135 тоштер экспонат ончыкталтеш. «Курымлан поянлыкше» ужаш шуэн вашлиялтше, историй акан ожнысо тошто ӱзгар- влаклан, башкир калык вургемын да ӱдырамаш- влакын сӧрастарымашыштлан пӧлеклалтын. Сурт-кӧргым ончыктымаште мебельым, тӱрлӧ той да пу атышӧрым, башкир пӧрт кӧргым, куымо ковёрым, кидвакшым, ӱдырамашын кидпашам шуктымо ӱзгар- влакым ужаш лиеш. Тыгак мастар- влакын ыштыме пашашт шинчам куандара. Выставке 18-ше февраль марте пашам ышта.
