«У ий открытке-2021-ше» фестиваль-конкурсым иктешлыме
«У ий открытке-2021-ше» ола кӱкшытан фестиваль-конкурсым иктешлыме. Тудо 3-шо гыч 16-шо декабрь марте заочный йӧн дене эртаралтын. Конкурсыш ушнышо- влак кокла гыч эн изиже- кум ияш, эн кугужо 58 ияш улыт. Чылаже 80 утла паша пурен. Нуным тӱрлӧ семын, устан ыштыме. Жюрин иктешлымыж почеш эн шуко баллым погышо ойыртемалтше паша- влак специальный диплом дене палемдалтыныт. Таҥасымашке рӱдӧ оласе 4-ше номеран йоча сымыктыш школ ушнен. Тушеч 20 йодмаш пурен. Поснак Татьяна Сизякинан, Яна Денисован, Софья Яшкован, Элиза Галкинан пашашт ойыртемалтын. Шуко открыткым ешартыш шинчымашым пуышо рӱдер колтен. Алла Гармашын пашажым палемдыме. Тыгак «Кече» йоча сад, Октябрьскысе тулык йоча- влаклан рӱдер гыч самырык сӱретче- влак ойыртемалтыныт. Чолган участвоватлыше нылымше номеран йоча сымыктыш школ, «Радуга» сымыктыш школ, «Хрусталик» йоча сад посна диплом дене палемдалтыныт. Чыла участник дипломым да кумылаҥдыше пӧлекым налеш.
