У Торъял районышто кокымшо кугу вольык комплексым чоҥаш тӱҥалыт

               У Торъял районышто кокымшо кугу вольык комплексым чоҥаш тӱҥалыт. Республикысе ик эн кугу ял озанлык предприятийын ончыкылыкшо да вияҥдыме планым Республикым вуйлатышын пашажым шуктышо Юрий Зайцев районыш мийымыже годым каҥашен. «Первый май» колхоз шӧрым пуышо вольык озанлыкым вияҥдыме, шӧр фермым чоҥымо да уэмдыме инвестиций проектым илышыш шыҥдара. Проектым 2024-ше ий марте палемдыме. Тиде жапыште озанлыкым вияҥдымашке 570 миллион теҥгем пыштыме лиеш. Проектым шындараш 38 гектар утла кумдык мланде участкым ойырымо.
              Озанлыкым вуйлатыше Аркадий Новиковын мутшо почеш, икымше йыжыҥыштыже кодшо ийын Чӱксола ялыште 504 вуй ушкаллан комплексым, Тушнур ялыште ял озанлык продукцийым аралаш клатым да презе вӱтам чоҥымо. Вольыклан йӧнаным ыштыме. Температура виктаралтеш, южтарымаш шке чӱкталтеш. Вольыкым компьютер эскера, черле вольык да тӱжаҥдышаш ушкал кораҥдалтеш. Кажне ушкалын шӧржӧ тергалтеш. Кызыт ик ушкаллан шотлымаште 27 литрым шупшылыт. Кече еда лу тонн шӧр колталтеш. Кызыт эше 504 вуй вольыклан комплексым чоҥаш проект документаций ямдылалтеш.
              Республикым вуйлатышын пашажым шуктышо кормам ямдылыме йодышеш посна шогалын. Аркадий Новиков каласен: кургым предприятий шкаланже гына огыл, ужалашат шапашла. Тыгак рапс ӱйым ыштен луктеш. Тудым экспортышкат колтат. Кодшо ийын 300 тонн рапс ӱйым йот элыш колтымо. Тыгак шудо гыч коштен гранулым ямдылат. Кодшо ийын элна мучко кум тӱжем тонным ужалыме.
             Фото: Марий Элым вуйлатышын организаций да аналитик виктемже.

Прошлые выпуски