Уэмдыме Шкетан театрым республикым вуйлатыше шке аклен
Шкетан лӱмеш калыкле марий драма театр олмыктымо деч вара шке омсажым уэш почо да 100-шӧ тургымжым тӱҥале. Театрыште пужен ышыме паша 2018-ше ийыште тӱҥалын ыле. Тиде жапыште пурымо тӱҥ верыште подиумым олмыктымо, интерьерым уэмдыме: ончымо залым, фойем ачалыме, лепниным, люстрым эрыктыме, у кӱварым шарыме, пырдыжым чиялтыме, сценын механик оборудованийжым вашталтыме. Шуктымо пашам аклаш республикым вуйлатыше Александр Евстифеев шке миен. Тудо чылажымат жапыштыже, сайын, у технологий дене ыштыме манын. Сценын кузе пашам ыштымыжымат ончышна. Тидыже репертуарым кумдаҥдаш полша, - ешарен Евстифеев. Калыкле театр поян историян. Сандене тудын тӱҥалтыш моторлыкшым арален кодаш тыршыме. Тиде республикыштына икымше театр. Тудлан тений 100 ий темеш. Тӱҥалтышыште шкенжын верже лийын огыл гын, кызыт мотор полатше уло. Тӱҥ пурымо верым ончена гын, тудым полатын стильже дене ыштыме, сценыш лектына гын, кызытсе жаплан келшыше техникан сооружений, кеч-могай спектакльым шындаш йӧным пуа,- каласен республикым вуйлатыше. Шушаш ийын Марий Эл 100 ийжым палемда. Театрым уэмдымаш лач тиде кугу лӱмгечылан ямдылалтмашын ик ужашыже. Моткоч сай- тудым чаплын да жапыштыже ыштен шуктымо. У тӱсым налше театрыш турист- влакат, верысе калыкат уло кумылын кошташ тӱҥалеш манын ӱшаным каласен республикым вуйлатыше.
