Йошкар-Олаште ртутян лампым умбакыже вашталтат
Йошкар-Олаште ртутян лампым умбакыже вашталтат. Тачысе кече марте оласе кудывечылаште тоштемше да аныкдыме 800 наре лампым кызытсе жаплан келшыше светодиодан светильник дене вашталтыме. Подрядный бригаде- влак кече мучко 50 наре лампым алмаштат. Кызыт тиде сомыл Тарханово, Гомзово микрорайонлаште да олан рӱдыштыжӧ шукталтеш. ММЗ-н тӱҥ энергетикшын мутшо почеш, тиде сомыллан Марий машиностроитель завод, Икымше ТЭЦ да Ола озанлык виктем шуко ямдылалтме пашам шуктеныт, келшыше светильник-влакым ойыркаленыт. Мартыште кудывечыласе лампе- влакым вашталтен пытарат да урем корнылаште уэмдаш тӱналыт. Пеҥгыдемдыме контракт почеш чылаже вич тӱжем утла светодиодан лампым вераҥдышаш улыт. Тыгай лампе электроэнергийым палынак аныклаш полшышаш.
